Wirja
Fl-1930, Louise Weiss tat bidu għan-"Nouvelle École de la Paix" (L-Iskola l-ġdida tal-Paċi) f'Pariġi. Din l-"Iskola tal-Paċi" kienet istituzzjoni privata ta' edukazzjoni għolja li kienet torganizza konferenzi u dibattiti fl-università Franċiża rinomata ta' Sorbonne dwar ġrajjiet kurrenti internazzjonali u l-kwistjonijiet politiċi, ekonomiċi, soċjali u kulturali ewlenin ta' dak iż-żmien. Weiss kienet tfittex li tiżviluppa t-tagħlim tal-paċi u trawwem qasam ta' għarfien espert ġdid fil-prevenzjoni tal-kunflitt.
Waqt li "L'Europe nouvelle" kienet primarjament indirizzata għall-elit fil-poter, kienet ukoll qed tipprova tilħaq lill-pubbliku ġenerali bil-messaġġ tagħha ta' paċi: studenti, mexxejja ta' negozji, għalliema, ħaddiema taċ-ċivil.
Kienu jsiru konferenzi kull ġimgħa li fihom kien ikun hemm politiċi, diplomatiċi, ġurnalisti, professuri tal-università, ekonomisti u kittieba jippreżentaw lectures fuq suġġetti bħall-kriżi ekonomika globali, il-fruntieri fl-Ewropa, il-ħolqien ta' reġimi totalitarji u l-għaqda Ewropea. Weiss żgurat li l-faċilità żammet rabta qawwija mal-Lega tan-Nazzjonijiet, l-aktar permezz ta' apprendistati, għotjiet għar-riċerka u vjaġġi ta' studju f'Ġinevra.
Madankollu, it-tensjonijiet li kienu qed joktru fis-snin 30 għamluha dejjem aktar diffiċli biex in-"Nouvelle École de la Paix" tkompli ħidmietha. Weiss malajr ivvalutat il-perikli tan-Naziżmu. It-tamiet u l-isforzi tagħha ġew effettivament sabotati minn diskors li Joseph Goebbels ta fil-Lega tan-Nazzjonijiet bħala l-Ministru tal-Propaganda tat-Tielet Reich, fejn iddeskriva l-Hitleriżmu bħala l-bidu tal-ordni fl-Ewropa. Hu argumenta li Ġermanja nazzjonal-soċjalista riedet tippromwovi l-paċi fost in-nazzjonijiet.
Dan il-fanatiżmu, Weiss ma felħitux u malajr ħasset li kellha tħalli warajha l-isforzi edukattivi tagħha u tindirizza kwistjonijiet oħra. Il-mewt tal-Ministru għall-Affarijiet Barranin Franċiż, Aristide Briand, fl-1932, fissret il-mewt tal-aħħar tamiet ta' "L'Europe nouvelle" għall-paċi u r-rikonċiljazzjoni bejn Franza u l-Ġermanja. L-għaqda tal-Ewropa kien se jkollha tistenna.
