Wirja
Il-karriera twila tagħha bħala attivista Ewropea u femminista għamlet lil Louise Weiss kandidat ideali għall-ewwel elezzjonijiet għall-Parlament Ewropew li saru b'suffraġju universali dirett fl-1979. L-eks Prim Ministru Jacques Chirac iddeskriva lil Weiss bħala l-"First Lady tagħna". Hi kienet waħda mill-aqwa kandidati għal-lista tad-"Difiża tal-interess ta' Franza fl-Ewropa". Waqt il-kampanja politika, hi rrifjutat li topponi lil Simone Veil, li kienet il-kap tal-lista tal-"Unjoni għad-Demokrazija Franċiża" tal-President Valéry Giscard d'Estaing.
Fis-17 ta' Lulju 1979, Louise Weiss, bħala l-Membru tal-Parlament Ewropew l-akbar fl-età, ippresediet is-seduta inawgurali tal-Parlament Ewropew il-ġdid fi Strasburgu. Weiss gawdiet dal-mument storiku u użat id-diskors tagħha biex tkellem direttament lill-politiċi Ewropej li kienu għadhom kif ġew eletti. Hi kienet u baqgħet attivista u b'hekk ħatfet l-opportunità biex twissi dwar il-perikli li "kult tal-antikwati" jitħalla jipparalizza l-azzjoni politika u enfasizzat l-isfidi futuri tal-kontinent: dawk tal-identità, ir-rata tat-twelid u d-drittijiet tal-bniedem. Hi argumentat li kien essenzjali li l-Ewropej jingħaqdu mhux biss fl-interessi ekonomiċi komuni iżda wkoll fil-kultura komuni tagħhom.
L-għada għaddiet il-Presidenza lil Simone Veil, li kienet ġiet eletta President tal-Parlament Ewropew.
Id-diskorsi tagħha fil-laqgħat tal-plenarja tal-Parlament Ewropew komplew ikopru firxa wiesgħa ta' tħassib ieħor, u fihom indirizzat, fost suġġetti oħra, l-intervent Sovjetiku fl-Afganistan, il-ġuħ fid-dinja, l-abbużi tad-drittijiet tal-bniedem, il-liġi tal-baħar u l-post ta' Strasburgu fil-qalba tal-Ewropa.
Seduta inawgurali tal-Parlament Ewropew elett b'vot universali dirett – Diskors ta' Louise Weiss
Il-pożizzjoni tagħha fuq il-Kumitat għaż-Żgħażagħ, il-Kultura, l-Edukazzjoni, l-Informazzjoni u l-Isport, saħansitra wasslitha biex tibda proġett ġdid: il-ħolqien ta' mużew dedikat għall-istorja tal-unifikazzjoni Ewropea.
Louise Weiss baqgħet politika attiva sa età avvanzata u mietet fl-1983 fl-età ta' 90 sena, qabel ma temmet il-mandat tagħha.
