Wirja
Għall-mexxejja Ewropej, il-Karta futura kellha tinkludi d-drittijiet tal-libertà u tal-ugwaljanza, id-drittijiet proċedurali, id-drittijiet fundamentali riżervati għaċ-ċittadini tal-Unjoni u d-drittijiet ekonomiċi u soċjali. L-għan prinċipali kien li tkun żgurata trasparenza akbar tas-sistema tal-protezzjoni tad-drittijiet tal-bniedem billi test wieħed jiġbor fih id-drittijiet eżistenti, li huma l-bażi tal-kultura u tas-sistema politika Ewropea. Iżda l-innovazzjoni prinċipali kienet l-aktar fil-proċedura implimentata: minflok ma sejħu negozjati diplomatiċi, il-mexxejja Ewropej iddeċidew li jgħaddu l-abbozzar tat-test lil grupp ta' ħidma kompost kemm mir-rappreżentanti tal-kapijiet ta' Stat jew ta' Gvern, tal-President tal-Kummissjoni Ewropea kif ukoll tal-membri tal-Parlament Ewropew u tal-parlamenti nazzjonali. Kien ukoll previst li rappreżentanti tal-Qorti tal-Ġustizzja jipparteċipaw bħala osservaturi.
Barra minn hekk, setgħu jinstemgħu wkoll rappreżentanti tal-Kumitat Ekonomiku u Soċjali u tal-Kumitat tar-Reġjuni kif ukoll tas-soċjetà ċivili. Il-metodu użat kien mhux biss miftuħ ħafna, iżda kien innovattiv u awdaċi. Fir-rigward tal-metodi tal-adozzjoni tal-Karta, il-Kunsill Ewropew f'Cologne ppreveda li l-abbozz tat-test ikun ippreżentat qabel ix-xahar ta' Diċembru tas-sena 2000 b'mod li jkun jista' jiġi ipproklamat solennement b'mod konġunt mill-Kunsill, il-Kummissjoni u l-Parlament.